Ministri i Shtetit për Administratën Publike dhe Antikorrupsionin, Znj. Adea Pirdeni, zhvilloi një takim mirëseardhjeje me të rinjtë ekselentë të përzgjedhur nga “Thirrja për Ekselentët”, një program i cili synon angazhimin e të rinjve më të talentuar në administratën shtetërore.
Gjatë kësaj thirrjeje, e gjashta në radhë, 105 ekselentë u përfshinë në administratë nga një total prej 463 aplikimesh. Ata janë shpërndarë në 50 institucione publike, me 80 prej tyre në Tiranë dhe 25 në rrethe, duke reflektuar një angazhim të gjerë institucional për mbështetjen e kësaj nisme.
Në fjalën e saj, ministrja Pirdeni vlerësoi përkushtimin akademik të të rinjve dhe nënvizoi se ky program është pjesë e një vizioni më të madh për përgatitjen e brezit të ri të administratës shqiptare në kuadër të integrimit evropian.
“Ju keni dëshmuar me punë me përpjekje me sakrifica që ju mund të jeni ekselentë. Në administratë ju do e nisni si specialist, në ato drejtori ku trajtohen ceshtje nga mjedisi tek shëndetësia, tek arsimi, ekonomia, financa. Pra ju jeni gjeneza e politikbërjes. Çdo përafrim i legjislacionit me BE nis nga ju. Shikojeni veten pjesë e panoramës, ju do e çoni përpara punën kolosale që Shqipëria të bëhët anëtare e BE, që brenda vitit 2027, jemi vetëm 34 muaj larg të realizojë të gjitha ato që ka marrë në zotim. Ju jeni bërë pjesë e kësaj nisme, jam e sigurt që do t’ju krijohet kjo ndjesia e madhe e përkatësisë së Shqipërisë në BE, ju do të vendosni një gur të vogël në rrugëtimin e vendit drejt BE-së” tha Pirdeni.
Të rinjtë e punësuar falë kësaj thirrjeje do të përfitojnë përvojë pune 1-vjeçare dhe pas një viti mund të aplikojnë në pozicionet e tyre apo dhe pozicione të tjera duke përmbushur kriterin e eksperiencës që kërkohet në fazën e rekrutimit me konkurs. Fillimisht të rinjtë do të trajnohen nga trajnerët e Shkollës Shqiptare të Administratës Publike (ASPA).
“Përmes trajnimit në ASPA, ju do të fitoni njohuritë e nevojshme për të funksionuar si pjesë e administratës publike. Do të mësoni se si të komunikoni në mënyrë zyrtare me eprorët dhe si të hartoni dokumente administrative sipas standardeve shtetërore,” tha ministrja Pirdeni.
Deri më sot, falë këtij programi, 484 studentë janë punësuar në shërbimin civil pas finalizimit me sukses të procesit të rekrutimit. Ky rezultat tregon suksesin afatgjatë të iniciativës dhe synimin e saj për të përgatitur brezin e ri të administratës shqiptare.
Programi “Thirrja për Ekselentët” mbetet një mekanizëm kyç për zhvillimin e kapaciteteve profesionale të të rinjve dhe orientimin e tyre drejt një karriere të suksesshme në administratën publike.