Ministri i Shtetit për Administratën Publike dhe Antikorrupsionin, Znj. Adea Pirdeni, ishte e pranishme në Strasburg të Francës nga data 17 deri më 19 mars 2025, ku ndoqi nga afër punimet e seancës së 99-të plenare të Grupit të Shteteve kundër Korrupsionit (GRECO), organ i Këshillit të Evropës.

Gjatë kësaj seance, u miratua Raporti i Raundit të Pestë të Vlerësimit për “Parandalimin e korrupsionit dhe promovimin e integritetit në qeverisjen qendrore dhe institucionet e zbatimit të ligjit”.

Ministrja Pirdeni, gjatë fjalës së saj, theksoi se: “Shqipëria përmbylli sot me sukses vlerësimin e GRECO-s për angazhimin intensiv në parandalimin e korrupsionit në qeverisjen qendrore dhe forcat e rendit. Falenderime të sinqerta për të gjithë kolegët që kontribuan në këtë arritje, duke dëshmuar se angazhimi sjell rezultate të prekshme”.

Sipas raportit të GRECO-s, Shqipëria ka shënuar progres të rëndësishëm në forcimin e integritetit dhe luftën kundër korrupsionit, pasi ka adresuar mbi 75% të rekomandimeve për qeverisjen qendrore dhe institucionet e zbatimit të ligjit.
Presidenti i GRECO-s, Z. David Meyer, e vlerësoi si të shkëlqyer rezultatin e Shqipërisë, duke theksuar progresin e ndjeshëm të vendit në forcimin e mekanizmave kundër korrupsionit.

Raporti i GRECO-s i la Shqipërisë për zbatim 24 rekomandime në lidhje me qeverisjen qendrore dhe institucionet e zbatimit të ligjit. Nga këto, 18 rekomandime janë realizuar plotësisht, ndërsa pjesa tjetër është pjesërisht e zbatuar, me vetëm një rekomandim që mbetet ende për të u implementuar.

Ky sukses në procesin e vlerësimit nga GRECO konfirmon angazhimin e Shqipërisë për forcimin e shtetit të së drejtës dhe përmbushjen e detyrimeve në kuadër të procesit të integrimit europian.