Shqipëria ka marrë pjesë për herë të parë me statusin zyrtar të shtetit vëzhgues në Rrjetin Evropian të Administratës Publike (EUPAN), një platformë kyçe e Bashkimit Evropian për shkëmbimin e praktikave më të mira dhe promovimin e inovacionit në administratën publike.

Në takimin e mbajtur më 13-14 mars në Varshavë të Polonisë, në kuadër të Presidencës Polake të Këshillit të BE-së, delegacioni shqiptar së bashku me përfaqësues të vendeve anëtare dhe kandidate të BE-së, diskutoi mbi sfidat dhe prioritetet e administratave publike evropiane, me fokus në: Etikën dhe transparencën në administratën publike; Përdorimin e inteligjencës artificiale dhe inovacionin digjital; Administratën e gjelbër; Digjitalizimin e shërbimeve publike; Zhvillimin e burimeve njerëzore në sektorin publik
Delegacioni shqiptar në këtë takim të rëndësishëm pune përfaqësohej nga Znj. Fotjona Taçe, Shefe e Kabinetit pranë Ministrit të Shtetit për Administratën Publike dhe Antikorrupsionin, Znj. Enkela Dudushi, Drejtore e Përgjithshme e Departamentit të Administratës Publike (DAP) dhe Z.Eneid Kërçini, Drejtor i Programeve të Reformës në Administratën Publike, DAP.
Ky angazhim shënon një hap të rëndësishëm për Shqipërinë në forcimin e kapaciteteve të administratës publike dhe rritjen e bashkëpunimit me vendet e BE-së, duke ndarë përvoja dhe duke ndjekur modelet më të avancuara të qeverisjes publike.

Rrjeti EUPAN është një mekanizëm i rëndësishëm i BE-së dhe përfshirja e Shqipërisë në këtë rrjet ofron një mundësi të re për të ndërtuar administratë publike më moderne, transparente dhe efikase, në përputhje me standardet evropiane.