Ministri i Shtetit për Administratën Publike dhe Antikorrupsinin Znj. Adea Pirdeni zhvilloi një takim konsultativ me përfaqësues të institucioneve shtetërore, përfaqësues të shoqërisë civile, partnerë ndërkombëtarë, me akademikë dhe grupe të ndryshme interesi për të diskutuar Draft-Strategjinë Ndërsektoriale për Reformën në Administratën Publike 2024-2030.
Ministrja Pirdeni teksa renditi risitë që sjell Draft-Strategjia Ndërsektoriale për Reformën në Administratën Publike 2024-2030 u shpreh se, Reforma në Administratën Publike, pjesë e Grup-kapitujve “Themeloret”, mbart rëndësi kritike në përparimin e procesit të negociatave, si shtyllë thelbësore për mirëfunksionimin e shtetit dhe si parakusht për avancimin e agjendës evropiane.
Duke folur për vizionin e Strategjisë, ministrja Pirdeni tha se synohet forcimi i një administrate efiçente, të paanshme, profesionale dhe efektive duke theksuar nevojën e reformimit të administratës në përputhje me standardet dhe praktikat më të mira evropiane dhe ndërkombëtare.
Strategjia Ndërsektoriale e Reformës në Administratën Publike 2024-2030 është e përbërë nga pesë qëllime politikash përmes të cilave synohet të jetëzohet vizioni i strategjisë, përkatësisht: Zhvillimi dhe Koordinimi i Politikave; Shërbimi Civil dhe Menaxhimi i Burimeve Njerëzore; Ofrimi i Shërbimeve dhe Digjitalizimi; Organizimi, Llogaridhënia dhe Mbikëqyrja e Administratës; Administrata e Gjelbër Publike.
Për të garantuar një zbatim efikas të strategjisë, është hartuar një plan I detajuar veprimi dhe një sistem monitorimi, i cili do të sigurojë përcaktimin e qartë të përgjegjësive, afateve dhe treguesve të performancës. SNRAP 2024-2030 përmban 16 objektiva specifikë; 76 masa; 2 plane veprimi (2024-2026; 2027-2030); mbi 20 institucione qendrore përgjegjëse;10 institucione të pavarura përgjegjëse.
Dokumenti u hodh për konsultim publik më datën 3 mars 2025, duke mundësuar përfshirjen e komenteve dhe sugjerimeve nga të gjithë aktorët e interesuar.
Ky proces synoi pasurimin e dokumentit dhe përfshirjen e perspektivave të ndryshme për të adresuar në mënyrë të plotë sfidat e identifikuara nga të gjithë aktorët dialogues.
Në SNRAP 2024-2030M janë adresuar gjetjet dhe rekomandimet e raportit të fundit të OECD/SIGMA 2024 në pesë shtylla dhe është linjëzuar me Udhërrëfyesin e RAP 2023-2030.
Strategjia Ndërsektorale për Reformën në Administratën Publike 2024-2030, është hartuar në bashkëpunim me projektin EU 4 Good Governance financuar nga BE, nën drejtimin e Ministrit të Shtetit për Administratën Publike dhe Antikorrupsionin, me punën teknike të Departamentit të Administratës Publike.
Gjatë eventit, ministrja Pirdeni falënderoi të gjithë pjesëmarrësit për kontributin e tyre të çmuar dhe duke theksuar rëndësinë e bashkëpunimit të ngushtë në këtë proces të rëndësishëm.