Ministri i Shtetit për Administratën Publike dhe Antikorrupsionin, Znj. Adea Pirdeni, ishte pjesë e delegacionit të drejtuar nga Kryeministri Edi Rama në Madrid të Spanjës, gjatë një vizite dy-ditore (6 dhe 7 shkurt 2025).

Në Pallatin Mbretëror Zarzuela, delegacioni shqiptar u prit nga Madhëria e Tij, Mbreti Felipe VI. Ky takim u zhvillua në kuadër të pjesëmarrjes në ceremoninë e Çmimit Universal Spanjoll (Espanol Universal Award), një çmim prestigjioz ndërkombëtar që i jepet personave me kontribut të shquar në promovimin e kulturës, gjuhës dhe trashëgimisë spanjolle në mbarë botën.

Gjatë kësaj vizite, u nënshkrua një marrëveshje me rëndësi të veçantë për organizimin në Tiranë të Kongresit Botëror të Ligjit 2027.

Kjo ngjarje madhore do të sjellë në kryeqytetin tonë rreth 3000 juristë nga gjykatat supreme dhe sistemet gjyqësore të mbarë botës, duke pozicionuar Shqipërinë si një qendër globale të drejtësisë dhe të shteteve të së drejtës.