Në një event unik për rajonin e Ballkanit, Fondacioni “Karlspreis”, i lidhur me çmimin prestigjoz ndërkombëtar “Karlspreis – Karli i Madh” (International Charlemagne Prize of Aachen), një nga nderimet më të larta evropiane për më shumë se shtatë dekada, mblodhi në Tiranë laureatë të këtij çmimi së bashku me liderë të rinj nga Shqipëria dhe pjesa tjetër e Evropës.
Ministri i Shtetit për Administratën Publike dhe Antikorrupsionin së bashku me Ministrin e Shtetit për Rininë dhe Fëmijët si dhe Agjencinë Kombëtare të Rinisë mirëpritën eventin e nivelit të lartë “NextGEN Voices for Europe (Zërat e gjeneratës së re për Evropën) të orientuar drejt të rinjve dhe bashkëpunimit evropian, të organizuar në bashkëpunim me Fondacionin Rinor Karlspreis.
Që prej vitit 1950, çmimi i madh “Karlspreis” u është akorduar personaliteteve dhe institucioneve me kontribut të spikatur në bashkimin dhe përparimin e Evropës përfshirë figura historike si Winston Churchill, “baballarëve themelues” të Bashkimit Evropian, Jean Monnet dhe Robert Schuman, diplomatit Henry Kissinger etj. Ky çmim ndërkombëtar mban emrin e Perandorit Karli i Madh, i cili sundoi pjesën më të madhe të Evropës Perëndimore. Ai u kurorëzua Perandor në Romë në vitin 800 dhe luajti një rol kyç në formësimin e historisë evropiane.
Deri më sot, çmimi i madh i është dorëzuar liderëve në detyrë dhe personaliteteve të shquara, si Presidenti i Ukrainës Volodymyr Zelensky, Presidenti francez Emmanuel Macron, ish-Presidenti amerikan Bill Clinton, ish-Kancelarja Angela Merkel, ish-Kryeministri britanik Tony Blair, Papa Françesku etj.
Më datën 29 maj 2025, çmimi “Karlspreis” do t’i dorëzohet Presidentes së Komisionit Evropian, Ursula von der Leyen për përpjekjet e saj në bashkimin e Unionit, menaxhimin e Pandemisë, forcimin e mbrojtjes së Evropës ndaj Rusisë si dhe nxitjen e Marrëveshjes së Gjelbër.
Në Tiranë, Kryeministri Edi Rama, dy laureatët e çmimit “Karlspreis”, Z.Martin Shulz, ish-President i Parlamentit Evropian dhe Znj.Veronika Tsepkalo, përfaqësuese e opozitës bjelloruse, Dr. Jürgen Linden, kryetar i bordit drejtues i “International Charlemagne Prize” përshëndetën fituesit e Çmimit të Rinisë Karlspreis, si dhe të rinjtë shqiptarë duke shkrirë kufijtë në një dialog pa doreza dhe të thelluar midis brezave, pa mbi të ardhmen e Evropës në vitin 2030.
Evropa ndodhet në një moment vendimtar. Teksa përballet me ndryshime gjeopolitike, transformimin digjital, pasiguri ekonomike dhe sfida klimatike, pyetja thelbësore që ngrihet është: Si do të jetë Shqipëria, Ballkani dhe Evropa që do të trashëgojë gjenerata e ardhshme dhe si mund të formësohet ajo? Për t’i dhënë përgjigje kësaj pyetje, të ftuarit e nderit së bashku me gjeneratën e re, vendimmarrës dhe ekspertë nga e gjithë Evropa diskutuan të ndarë në disa panele në mënyrë dinamike mbi rolin e rinisë në të ardhmen e kontinentit Evropian.
Përtej debatit intelektual, “NextGEN Voices for Europe” do të ofrojë një përvojë të pasur kulturore, duke nxjerrë në pah trashëgiminë historike dhe aspiratat evropiane të Shqipërisë.
Të ftuarit në eventin “NextGEN Voices for Europe” (Zërat e Gjeneratës së Re për Evropën) do të kenë mundësinë të zbulojnë trashëgiminë e pasur kulturore të Shqipërisë përmes një vizite në qytetet historike të Krujës dhe Durrësit. Ky udhëtim do t’u ofrojë një përvojë autentike, duke i njohur më nga afër me historinë, traditat dhe vlerat që e lidhin Shqipërinë me aspiratat evropiane.