Ministri i Shtetit për Administratën Publike dhe Antikorrupsionin, Znj. Adea Pirdeni, mori pjesë në konferencën ministrore “Kapacitetet e administratave publike për integrim në Bashkimin Evropian dhe më tej”, e organizuar nga Komisioni Evropian me mbështetjen e SIGMA-s.
Në konferencë morën pjesë ministra dhe përfaqësues nga vendet e Ballkanit Perëndimor, Moldavia dhe Armenia, si dhe nga organizatat rajonale dhe ndërkombëtare si ReSPA, OECD, RCC dhe WEBER.
Gjatë fjalës që mbajti në konferencë, ministrja Pirdeni prezantoi përvojën e Shqipërisë në ndërtimin e kapaciteteve dhe përgatitjen, trajnimin e stafeve të administratës publike për t’i bërë ballë procesit tejet intensiv të anëtarësimit në BE, ku kryefjalë mbetet inovacioni. Gjithashtu ministrja Pirdeni u ndal tek rëndësia e profesionalizmit të trupës së nëpunësve civilë të nivelit të lartë drejtues si një komponent kyç i qeverisjes efektive.
Konferenca mblodhi së bashku ministra nga vendet e zgjerimit të BE-së, si dhe Komisionin Evropian dhe OECD-në, për të shkëmbyer mesazhe kryesore, përvoja, praktika të mira dhe mësime të nxjerra në lidhje me zhvillimin e kohëve të fundit të administratave publike të Ballkanit Perëndimor dhe të Partneritetit Lindor, dhe për të diskutuar sfidat kryesore të rritjes së kapaciteteve të nevojshme të administratave publike për t’u përballur me kërkesat e vështira të integrimit në BE.
Cilësia e administratës publike njihet gjerësisht si një faktor themelor i zhvillimit ekonomik dhe shoqëror Vendet me institucione të forta, me një shërbim civil profesionist dhe një qasje të përqendruar tek përdoruesi për ofrimin e shërbimeve janë më të mira për sa i takon krijimit të një mjedisi që nxit konkurrueshmërinë, lehtëson rritjen ekonomike, zvogëlon varfërinë dhe sjell rezultate për qytetarët.
Kapaciteti i administratave publike ka rëndësi shumë të madhe për proceset e integrimit në BE. Partnerët e Ballkanit Perëndimor, si dhe disa vende të Partneritetit Lindor Evropian, e kanë pranuar anëtarësimin në BE si një përparësi kryesore kombëtare dhe janë zotuar të përafrojnë legjislacionin e tyre kombëtar me acquis të BE-së. Metodologjia e rishikuar e Zgjerimit të BE-së e vitit 2020 ka përcaktuar sundimin e ligjit dhe qeverisjen publike si ndër komponentët e saj themelorë.
Aftësitë e qëndrueshmërisë dhe të përshtatjes së administratave në kontekstin e sfidave dhe trazirave globale të kohëve të fundit dhe të atyre në zhvillim përbëjnë gjithashtu faktorë me rëndësi kritike të suksesit të stabilitetit dhe zhvillimit ekonomik e social në kohë të pasigurta.
Për këto arsye, në mënyrë të veçantë, vëmendja ndaj funksionimit të efektshëm dhe me efikasitet të administratave publike dhe mënyrave për të rritur performancen e tyre po bëhen tema diskutimesh globale.
SIGMA monitoron në mënyrë sistematike performancën në raport me Parimet e Administratës Publike, një kuadër i përbashkët i standardeve të politikave i BE-OECD-së.