Adea Pirdeni është betuar sot para Presidentit të Republikës, Bajram Begaj, si Ministre për Administratën Publike. Për herë të parë, Shqipëria ka një ministri me portofol të dedikuar për reformën e administratës publike dhe mirëqeverisjen, një zhvillim i rëndësishëm që mbështetet në punën dhe reformat e udhëhequra nga Pirdeni që prej janarit 2024, në detyrën e Ministres së Shtetit për Administratën Publike dhe Antikorrupsionin. Reformat e ndërmarra në modernizimin e shërbimit civil, forcimin e meritokracisë, riorganizimin institucional dhe rritjen e llogaridhënies marrin tashmë një mbështetje më të fortë institucionale. Ky hap shënon njëkohësisht njohjen e punës së deritanishme dhe një përgjegjësi të shtuar për të çuar përpara ndërtimin e një administrate më profesionale, efikase dhe në shërbim të qytetarëve, në rrugën e Shqipërisë drejt Bashkimit Europian.