Ministrja Pirdeni: “Vlerësim nga Komisioni Evropian – Reforma e Administratës Publike e mirë-kornizuar dhe në zbatim. Tashmë fokusi është te rezultatet konkrete”
 
6 Nëntor 2025 – Ditën e sotme, Ministrja e Shtetit për Administratën Publike dhe Antikorrupsionin, Adea Pirdeni raportoi në seancë plenare në lidhje me veprimtarinë e Departamentit të Administratës Publike (DAP) për vitin 2024. 
 
Ajo u ndal fillimisht tek Raporti i Progresit për Shqipërinë për vitin 2024 – publikuar dy ditë më parë nga Komisioni Evropian – ku reforma në administratën publike vlerësohet si e mire-kornizuar dhe në zbatim – dhe është objektivisht me progres në të 6 shtyllat e saj, me rezultate të matshme. 
 
“Veçanërisht, Komisioni ka evidentuar plotësimin e kuadrit strategjik të reformës me dy strategjitë për antikorrupsionin dhe atë të dedikuar për reformën në administratën publike deri në vitin 2030-të, shtrirjen e Planeve të Integritetit në mënyrë kapilare në të gjithë qeverisjen qendrore, menaxhimin e qëndrueshëm të riskut fiskal, si dhe rritjen progresive të buxhetimit gjinor të politikave në të gjitha fushat.” – u shpreh Ministrja Pirdeni. 
 
Ministrja Pirdeni nënvizoi se viti 2024 ka qenë një vit i rëndësishëm për konsolidimin e reformës në administratën publike, teksa merr për bazë edhe vlerësimin periodik të OECD/SIGMA, të publikuar në dhjetor 2024 – si një nga provat më të plota të progresit të administratës sonë publike. 
 
Në fjalën e saj, Ministrja Pirdeni u ndal tek reforma domethënëse e pagave, e nisur në vitin 2023 dhe e vijuar plotësisht gjatë vitit 2024: “Ajo ka sjellë rritje mesatarisht nga 35% deri në 65%, në varësi të kategorive, dhe ka çuar pagën mesatare në administratë në rreth 100,000 lekë, pothuajse dyfishi i vitit 2013-të. Kjo reformë është vlerësuar pozitivisht nga Komisioni Evropian, jo vetëm për rritjen nominale të pagave, por edhe sepse shoqërohet me një model më të drejtë karriere, shpërblimesh dhe vjetërsie, falë rritjes së indeksit të shkallës së komprimimit të pagave dhe peshës së elementit të vjetërsisë në pagën totale.”

Në lidhje me pagat, Ministrja Pirdeni nuk la pa përmendur edhe lajmin shumë të mirë që vjen me projekt-buxhetin e vitit 2026, i cili është fillimi i praktikës së indeksimit vjetor – edhe për pagat e punonjësve të sektorit publik, qoftë në nivel qendror, qoftë në nivel vendor, të cilat do të korrektohen çdo vit në bazë të inflacionit.
  
Sipas Ministres Pirdeni, efektet e reformës janë reflektuar edhe në perceptimin e punonjësve. “Sondazhi rajonal mbi burimet njerëzore në administratë tregon se kënaqësia me pagën është trefishuar – nga 13% në vitin 2022, në 47% në vitin 2024.” – u shpreh ajo.

Në lidhje me forcimin e kapaciteteve të administratës publike, Ministrja Pirdeni theksoi se përgjatë vitit 2024, Shkolla Shqiptare e Administratës Publike (ASPA) ka trajnuar 8,184 punonjës të administratës publike, duke dyfishuar numrin e trajnuar një vit më parë.  “Një tjetër risi e rëndësishme ishte edhe Programi i Zhvillimit të Lidershipit, i zbatuar për herë të parë për 267 drejtues të nivelit të mesëm dhe të lartë, me fokus tek aftësitë e udhëheqjes, menaxhimit dhe motivimit.” – shtoi ajo.
 
Ndër të tjera, znj. Pirdeni cilësoi se viti 2024 ka sjellë përparim të dukshëm edhe në dimensionin e inovacionit dhe digjitalizimit, veçanërisht në përdorimin e inteligjencës artificiale për përgatitjen dhe analizën e projekt-akteve, si dhe në lehtësimin e proceseve të punës brenda administratës.

Ajo vlerësoi edhe punën shumë të rëndësishme të kryer përgjatë këtyre dy viteve në zbatim të njëhershëm të rekomandimeve të Kuvendit dhe të Raportit të Komisionit Evropian, pikërisht rishikimin paralel të dy ligjeve bazë të administratës publike: ligjit “për Nëpunësin Civil” dhe ligjit “për organizimin dhe funksionimin e administratës shtetërore”. 
 
 “Të dyja këto ligje përbëjnë themelet e ngrehinës ligjore të administratës publike dhe për këtë arsye procesi i ndërhyrjes në to është zhvilluar me analizë të thelluar, në bashkëpunim me ekspertë vendas dhe ndërkombëtarë, dhe me referencë të drejtpërdrejtë ndaj rekomandimeve të SIGMA-s, Komisionit Evropian dhe Kuvendit të Shqipërisë.” – u shpreh Ministrja Pirdeni.
 
Në fund, por jo më pak nga rëndësia, Ministrja Pirdeni theksoi se Shqipëria ka bërë hapa konkretë edhe në pozicionimin evropian të administratës publike – në të njëjtën linjë me modernizimin e brendshëm:

“Në nëntor 2024, vendi ynë mori statusin e Vëzhguesit në Rrjetin Evropian të Administratës Publike (EUPAN), duke u përfshirë për herë të parë në platformën më të lartë të dialogut ndërqeveritar mes administratave të vendeve anëtare të BE-së. Është një hap që tregon se Shqipëria nuk po përgatitet vetëm të përafrohet me administratat e vendeve anëtare, por po hyn gradualisht në rrjetet ku ato bashkëvendosin.” – tha Ministrja Pirdeni në prezantimin e veprimtarisë së DAP përgjatë vitit 2024.